Ráðstefna 19. nóvember
UMSK, ÍBR og ÍBH standa að ráðstefnu um íþróttastarf barna fimmtudaginn 19. nóvember kl. 14 á Grand hótel. Aðgangur að ráðstefnunni er öllum ókeypis og við hvetjum þá sem láta sig íþróttastarf barna varða til að skrá sig hér:
Íþróttastarf barna á Íslandi er gríðarlega öflugt og stendur sterkt í alþjóðlegum samanburði. Undanfarið hefur umræða meðal foreldra og íþróttahreyfingarinnar opnað á áhyggjur sem byggjast ekki síst á kostnaði og hentugleika. Æfingagjöld, búnaður, mót og ferðalög leggjast á fjölskyldur á sama tíma og við gerum meiri kröfur um hæfa þjálfara og almenn gæði. Við viljum að börnin fái að njóta sín í íþróttum og upplifa þann heilsufarslega og félagslega ávinning sem íþróttir bjóða. Við viljum líka öflugt afreksstarf sem skilar árangri á heimsvísu og hæfa þjálfara í verkefnin.
En spurningin er því hreinlega: Hvers virði er öflugt íþróttastarf barna fyrir samfélagið og hvert stefnum við?
Sjö fyrirlesarar sem búa yfir gríðarlegri þekkingu á íþróttastarfi mæta á staðinn og varpa ljósi á stöðuna. Rætt verður hvernig íþróttastarf við viljum fyrir börnin okkar, hvaða áherslur eru mikilvægar í umræðunni og hvaða tækifæri eru til staðar. Fundinum stýrir Kristjana Arnarsdóttir, sem hefur víðtæka reynslu af fjölmiðlun og íþróttum.
Fyrirlesarar eru eftirfarandi:
Daði Rafnsson, fagstjóri afrekssviðs MK
Einar Ingi Hrafnsson, framkvæmdarstjóri Aftureldingar
Ólafur Stefánsson, handknattleiksmaður
Pálmar Ragnarsson, körfuknattleiksþjálfari
Rakel Dögg Bragadóttir, handknattleikskona og foreldri
Sólný Pálsdóttir, foreldri
Viðar Halldórsson, prófessor við HÍ