586 Íþróttalíf í lamasessi Til að sýna þau áhrif sem COVID-19 hafði á allt íþróttalíf í landinu er Stjarnan í Garðabæ tekin sem dæmi, í ársskýrslu félagsins fyrir árið 2020 segir: „Covid setti miklar hömlur á starfsemi félagsins á árinu. Rétt áður en félaginu var gert að stöðva alla starfsemi sína vegna þess vágests sem herjaði á landið og heimsbyggðina alla, náði meistaraflokkur karla í körfubolta ásamt meistaraflokki kvenna í hópfimleikum að tryggja sér Bikarmeistaratitil fyrir árið 2020. En þann 16. mars var öllu skellt í lás hjá Stjörnunni líkt og öðrum íþróttafélögum og fordæmalausar aðstæður kölluðu á lausnarmiðaðan hugsunarhátt. Var framkvæmd æfinga fært í form heimaæfinga þar sem stuðst var við ýmiskonar lausnir líkt og æfingar í gegnum Zoom fundarbúnaðarkerfi, Sideline og Sportabler. Fella þurfti niður Íslandsmót hjá meistaraflokkum í vetrargreinum sem setti sérstakan og dapran brag á endapunkt keppnistímabilið fyrir íþróttamenn þeirra greina sem höfðu keppt að einu markmiði allan veturinn. Eins þurfti að fella niður allt viðburðahald hjá félaginu á vormánuðum og má þar einna helst nefna TM mót Stjörnunnar í knattspyrnu, Stjörnustríðsmót körfuknattleiksdeildar sem samtals hafa tekið á móti hátt í 5.000 keppendum ár hvert og verið stór liður í starfsemi barna- og unglingastarfs félagsins.“823 Árið 2021 herjaði faraldurinn enn á land og lýð eins og lesa má í ársskýrslu Stjörnunnar: „Líkt og árið á undan fór starfsárið 2021 ekki varhluta af samkomutakmörkunum, skyndilokunum og alls kyns öðrum sóttvarnaraðgerðum. Eftir víðtækar takmarkanir á íþróttastarfi yfir áramót var leyfi loks gefið um miðjan janúar fyrir æfingum yngri iðkenda upp að 16 ára aldri, en þó eingöngu að ströngum sóttvarnarskilyrðum uppfylltum. Afrekshópar félagsins höfðu þá þegar fengið undanþágu frá almennu æfingabanni og máttu halda úti æfingum í fámennum hópum án snertinga. Eftir sat hins vegar viðkæmur aldurshópur, 16–20 ára ungmenni sem ekki sóttu æfingar með meistaraflokkum félagsins. Óhætt er að segja að áhyggjur forsvarsmanna félagsins af félagslegri einangrun þessa aldurshóps hafi verið verulegar, einkum og sér í lagi þar sem skólahald lá einnig niðri á sama tíma. Var rík áhersla lögð á að þjálfarar væru í góðum samskiptum við sína iðkendur, leggðu sig fram um að vera lausnamiðaðir varðandi heimaæfingar og hvettu til almennrar hreyfingar. Engu minni áhersla var lögð á mikilvægi þess að þjálfarar stuðluðu að félagslegum samskiptum á milli iðkenda og reyndu eftir fremsta megni að huga að andlegri og líkamlegri heilsu þeirra. En faraldurinn hafði ekki einungis áhrif á iðkendur félagsins heldur var allt viðburðahald og kappleikir í sérkennilegum búningi lengi fram eftir ári, þar sem áhorfendur voru ýmist alfarið bannaðir eða leyfðir að mjög stífum sóttvarnarskilyrðum uppfylltum. 25 til 500 áhorfendur hverju sinni, sóttvarnarhólf og aðrar íþyngjandi takmarkanir sem kölluðu á strangari umgjörð og aukið umfang. Varpaði ástand þetta óneitanlega skugga á kappleiki og ýmsa viðburði félagsins. En það er einnig á stundum sem þessum sem hið sanna Stjörnuhjarta slær hvað sterkast. Aðdáunarvert var að fylgjast með metnaði, eljusemi og þrautseigju sjálfboðaliða jafnt sem starfsmanna, sem tókust á við síbreytilegar aðstæður þar sem oft á tíðum þurfti á örskotsstundu að aðlaga starfsemina að nýjum leikreglum og tileinka sér nýja tækni og vinnubrögð.“824 Merki Garðabæjar.
RkJQdWJsaXNoZXIy MjQwMzI0OQ==