464 Tímamót við brúna Landsmót UMFÍ í Borgarnesi 4.–7. júlí 1997 „Velkomin öll þið verið“ Á 9. áratugnum sótti UMSB um að halda 22. landsmót ungmennafélaga og var það endanlega samþykkt árið 1990 af stjórn UMFÍ. Skyldi mótið haldið í Borgarnesi árið 1997. Borgfirðingar höfðu tvisvar áður haldið landsmót, á Hvanneyri árið 1943 og Akranesi 1975 þar sem UMSK vann frækilegan sigur. Mikil uppbygging mannvirkja var nauðsynleg í Borgarnesi fyrir landsmótið, íþróttahús var til staðar en reisa þurfti nýja sundlaug og frjálsíþróttavöll með gerviefnum á atrennu- og hlaupabrautum. Honum var fundinn staður á landfyllingu skammt frá Brákarsundi og hlaut hann nafnið Skallagrímsvöllur. Þrátt fyrir þessar miklu framkvæmdir þurfti hluti mótsins að fara fram annarsstaðar, riðlakeppnin í knattspyrnu var haldin á Hvanneyri, einnig briddskeppnin og hluti af starfsíþróttunum. Í íþróttahúsinu á Akranesi fór fram hluti af keppninni í körfubolta og blaki en úrslitaleikirnir í Borgarnesi. Annar ókostur var að tjaldbúðirnar voru utan bæjarins, alllangt frá keppnissvæðinu, en til að liðka fyrir umferð gengu strætisvagnar þar á milli frá morgni til kvölds. Reynsla síðustu landsmóta hafði sýnt að aðgangseyrir stóð ekki undir kostnaði við mótshaldið og var tekin sú ákvörðun að sleppa honum alfarið og einnig minjagripasölu sem skilaði ekki ágóða. Þess í stað voru þátttökugjöld keppenda hækkuð töluvert og leitað eftir styrktaraðilum hjá stöndugum fyrirtækjum í héraðinu sem brugðust vel við. Þar komu til sögunnar Afurðasalan Borgarnesi hf., Kaupfélag Borgnesinga, Sparisjóður Mýrasýslu, Loftorka hf. og Vírnet hf. Ingimundur Ingimundarson, íþróttakennari og framkvæmdastjóri UMSB, var formaður landsmótsnefndar en Kristmar Ólafsson var ráðinn framkvæmdastjóri mótsins. Landsmótsfréttir komu út reglulega fyrir mótið og fluttu tíðindi af gangi mála og blaðið Brák kom út á sérhverjum keppnisdegi með nýjustu fréttir af mótinu.578 Þegar leið að landsmóti var allt til reiðu, aðstæður voru afar góðar og í leikskrá mótsins voru gestir boðnir velkomnir með vísu sem hófst þannig: Velkomin öll þið verið í víðfeðman Borgarfjörð. Horft yfir Borgarnes. Hinn nýi Skallagrímsvöllur sést vel til vinstri á myndinni, völlurinn var byggður á landfyllingu.
RkJQdWJsaXNoZXIy MjQwMzI0OQ==