448 þræða agn upp á krókalínu sem var notuð við veiðar á línubátum. Fólk sem stundaði þetta starf gat náð ótrúlegum hraða og leikni, greinin vakti ævinlega athygli á landsmótum og dró að sér forvitna áhorfendur. Í Mosfellsbænum voru þeir reyndar fáir og ástæðan var einföld: „Engan þarf að undra að fáa fýsti að fara af stað að leita að landsmóti í moldarmekkinum í Mosfellsbæ. Í verstu vindhviðunum sá ekki [út] úr augunum. … Ekki var þó frestað keppni svo nokkru næmi, keppendur í utanhússgreinum bitu á jaxlinn og reyndu að loka vitunum eftir föngum en þeir sem innanhúss kepptu hrósuðu happi yfir því að hafa valið sér rétta grein að keppa í. Fáeinir eitilharðir áhorfendur flöksuðust til við íþróttavellina, tóku fyrir vit sér í verstu hviðunum og fylgdust með ennþá harðari íþróttamönnum. Fáir treystu sér þó til að fylgjast með starfsíþróttamönnum sem reyndu að beita línu sunnan undir íþróttahúsinu þar sem rokið stóð af malarvellinum og gerði aðstæður vægast sagt óvenjulegar.“554 17 manns tóku þátt í þessari vindasömu keppni á Varmá, þar af voru þrír frá UMSK: Margrét Pálsdóttir, Sólveig Benjamínsdóttir og Sveinn S. Valsson. Sigurvegarinn var hinsvegar Bæring Ólafsson, hann keppti fyrir hönd Héraðssambands Bolungarvíkur (HSB) sem var stofnað árið 1982. Pönnukökubakstur er skemmtileg grein sem hafði legið niðri á undanförnum landsmótum en var nú tekin upp að nýju. 20 keppendur mættu til keppni, þar af þrír karlmenn en þeir höfðu ævinlega verið fáséðir í þessari grein. Þátttakendur voru óspart hvattir áfram af stuðningsfólki sínu og dómnefndin beið spennt eftir því að hefja störf sem voru fólgin í því að bragða á kræsingunum og leggja mat á afurðir og frammistöðu. Niðurstaðan varð sú að Ólafía Ingólfsdóttir (HSK) frá Vorsabæ í Flóa bar sigur úr býtum, fyrir hönd UMSK kepptu Anna Rannveig Jónatansdóttir, Jóhanna Stefánsdóttir og Una Sigrún Jónsdóttir. Keppni í starfshlaupi fólst í því að hlaupa ákveðna vegalengd og leysa ýmiskonar þrautir á leiðinni þar sem reyndi bæði á andlegt og líkamlegt atgervi þátttakenda. Fyrst var keppt í starfshlaupi á landsmótinu á Eiðum árið 1952, þar voru einungis fjórir keppendur og Hreinn Ólafsson úr UMSK lenti þar í 2. sæti. Þremur árum síðar var keppt í starfshlaupi á landsmótinu á Akureyri, þar var mjög góð þátttaka og fjórir keppendur frá UMSK. Síðan féll starfshlaupið niður á landsmótum allt þar til það var endurvakið á Selfossi árið 1978, þangað mætti 21 þátttakandi, þar af tvær konur. Á næstu landsmótum eftir Selfossmótið var ævinlega keppt í starfshlaupi og verkefnin sem þátttakendur þurftu að leysa voru breytileg og að sjálfsögðu ekki upplýst um þau fyrr en á hólminn var komið. Í Mosfellsbæ mættu 37 starfshlauparar til leiks, þar af tvær konur. Tveir keppendur komu frá UMSK, Böðvar Bjarnason og Lúðvík Björgvinsson, en sigurvegari í hlaupinu var Kristján Þorsteinssonúr úr UMSE. Guðmundur Hallgrímsson úr UÍA keppti þarna á sínu 11. landsmóti og lenti í 4. sæti í hlaupinu. Keppendur þreyttu 600 metra skeið sem var þyrnum stráð því á leiðinni var þeim gert að sigrast á ýmsum þrautum, til dæmis að aka hjólbörum yfir vegasalt, stökkva þrjá metra í langstökki eða því sem næst og drekka hálfan lítra af kóka kóla sem stóð í þeim sem voru ekki vanir slíkri íþrótt. Þess má geta að kókframleiðandinn Vífilfell var meðal styrktaraðila mótsins og þótti sumum það stinga í stúf við þá hollustu sem átti að fylgja íþróttaiðkun. Þingeyingurinn Kristján Yngvason tók þátt í starfshlaupinu og fór þaðan beint í glímukeppnina. Hann gaf kókdrykkjunni þessa einkunn: „Það var bölvað. Ekki síst þar sem það var svona rétt fyrir glímuna. Þetta situr svolítið í mér ennþá.“555 Sund. Sundkeppnin fór fram í Varmárlaug sem var komin vel á þrítugsaldurinn, vígð árið 1964, 25 m löng og 8 m á breidd og þótti fullmjó sem keppnislaug. Hvassviðrið og moldrokið hafði slegið brúnum lit á laugarvatnið þegar Halldór Jökull Ragnarsson, sundþjálfari UMSK, mætti til leiks ásamt fríðum flokki keppenda. Verðlaunahafar frá sambandinu voru, taldir í stafrófsröð: Auður Sigurðardóttir varð í 2. sæti í 200 m bringusundi. Geir Birgisson vann silfurverðlaun í þremur greinum: 800 m skriðsundi, 100 m baksundi og 200 m fjórsundi. Hrafnhildur Hákonardóttir sigraði í 100 m baksundi og lenti í 3. sæti í 100 m og 400 m skriðsundi. Ingþór Eiríksson hreppti bronsverðlaun í 200 m bringusundi. Kristinn Már Þorkelsson vann silfur í 50 m og 100 m skriðsundi. Kristján Sigurðsson vann tvenn gullverðlaun, í 100 m og 200 m bringusundi, og silfur í 100 m flugsundi. Kvennasveit UMSK varð í 3. sæti í 4 x 100 m fjórsundi og karlasveitin vann silfur í 4 x 100 m skriðsundi og 4 x 100 m fjórsundi. UMSK sigraði glæsilega í stigakeppninni og batt enda á 22 ára sigurgöngu HSK á landsmótum. Í sigurgleðinni köstuðu keppendur UMSK Halldóri Jökli þjálfara sínum út í moldbrúnt laugarvatnið! HSK lenti í 2. sæti og voru þessi tvö héraðssambönd í nokkrum sérflokki í keppninni. Í sundliði HSK voru þrjú systkini frá Þorlákshöfn mjög sigursæl, þau Magnús Már, Bryndís og Arnar Freyr Ólafsbörn. Sundlaug kom
RkJQdWJsaXNoZXIy MjQwMzI0OQ==