352 Starfsíþróttir. Í starfsíþróttum var Trausti Sveinbjörnsson eini keppandinn úr UMSK sem komst á verðlaunapall en hann hampaði silfurverðlaunum í starfshlaupi líkt og á landsmótinu á Selfossi fjórum árum fyrr. 25 karlar og ein kona tóku þátt í starfshlaupinu. Sund. Í sundliði UMSK bar mest á Margréti M. Sigurðardóttur sem varð næststigahæst kvenna á mótinu. Hún sigraði í 100 m flugsundi, á nýju landsmótsmeti, 1:16,1 mín., vann brons í 200 m bringusundi, synti á 3:06,6 mín. og silfur í 200 m fjórsundi, synti á 2:46,4 mín. Sveit UMSK lenti í öðru sæti í 4 x 100 m skriðsundi og 4 x 100 m fjórsundi. Karlasveit UMSK vann einnig til verðlauna í boðsundum, í 4 x 100 m skriðsundi og 4 x 100 m fjórsundi. Sundfólk úr UMSK lenti í 3. sæti í stigakeppninni á eftir HSK og Njarðvíkingum (UMFN). Formennskan var skóli Þegar landsmót UMFÍ var haldið á Akureyri árið 1981 var Kristján Sveinbjörnsson formaður UMSK en hann gegndi einnig formennsku í Ungmennafélagi Bessastaðahrepps um skeið. Árið 1986 fékk Kristján félagsmálaskjöld héraðssambandsins „… fyrir frábær störf í þágu sambandsins og Umf. Bessastaðahrepps.“319 „Frá fyrstu tíð var ég á kafi í félagsmálunum, sagði Kristján í viðtali árið 2018. Ég varð formaður Ungmennafélags Bessastaðahrepps þegar ég var 18 ára og þannig mynduðust tengsl við UMSK, ég varð sjálfkrafa stjórnarmaður þar. Ég var alltaf meira í félagsmálunum en íþróttunum, fór á námskeið í félagsmálakennslu og kenndi sjálfur mikið á námskeiðum sem voru mjög vinsæl víða um land á tímabili. Reynir Karlsson, sem var formaður Breiðabliks um skeið, átti stóran þátt í að byggja upp félagmálaskólann, hann útbjó meðal annars námsefni og námskeiðin lífguðu upp á starfið víða um land. En hvenær varðst þú formaður UMSK? Það var árið 1981, ég hafði þá búið erlendis í eitt ár en þegar ég sneri aftur á heimaslóðir fannst mér frekar dauft yfir starfsemi sambandsins. Ég vildi leggja mitt af mörkum og svo fór að ég var kosinn formaður UMSK og gegndi því starfi til ársins 1985. Ég kunni vel við mig í formennskunni, mér fannst ég ná að stilla saman marga strengi. Í minni stjórnartíð breyttist fyrirkomulagið varðandi stjórn UMSK, formenn félaganna urðu ekki sjálfkrafa stjórnarmenn. Fór mikill tími í að sinna þessu starfi? Já, ég eyddi miklum tíma í þetta, mér fannst þetta gaman og formennskan var mikill skóli fyrir mig. Árið 1982 réðum við Helga Gunnarsson sem framkvæmdastjóra í sumarstarf og næstu tvö sumrin á eftir Gunnar Baldvinsson, ég eyddi oft 1–2 klukkutímum á hverjum degi niðri á skrifstofunni í vinnu með honum. Þetta var náttúrlega bilun! Ég var einnig að reka lítið rafvirkjafyrirtæki og gaf bara upp símanúmerið hjá UMSK. Þetta var auðvitað fyrir tíma farsímanna en svo kom bílasíminn gamli og tímarnir breyttust. Hvernig var fjárhagsstaða sambandsins á þessum árum? Það skorti auðvitað alltaf fé, við herjuðum stöðugt á sveitarfélögin til að fá hærri framlög. Það voru allir velviljaðir UMSK og sambandið stuðlaði einnig að samstarfi milli sveitarfélaganna. Síðan kom lottóið til sögunnar og það gjörbreytti fjármálunum. Hverjir voru helstu UMSK-viðburðirnir á þessum árum? Það voru nú ýmsir viðburðir, við héldum félagsmálanámskeið og komum á fót knattspyrnumótum, handboltamótum, karatemótum og öðrum héraðsmótum, einnig tókum við þátt í að skipuleggja útihátíðir, meðal annars við Félagsgarð í Kjós og í Þjórsárdal. Skólahlaup UMSK var mjög vel heppnað og landsmótin voru stóru verkefnin. Árið sem ég tók við formennskunni var landsmót UMFÍ haldið á Akureyri þannig að starfið byggðist mikið í kringum þátttöku UMSK í því. Landsmótin voru ævinlega hápunkturinn í starfsemi sambandsins, sagði Kristján Sveinbjörnsson að lokum.“320 Kristján Sveinbjörnsson.
RkJQdWJsaXNoZXIy MjQwMzI0OQ==