279 glæsilegt Íslandsmet. Í sveitinni voru Jensey Sigurðardóttir, Kristín Björnsdóttir, Hafdís Ingimarsdóttir og Kristín Jónsdóttir.156 Auk þessa afreksfólks er ónefndur Einar Óskarsson sem sigraði í víðavangshlaupi UMSK árið 1971, aðeins 16 ára gamall, hann varð mjög öflugur hlaupari, setti bæði sveinamet og drengjamet í hlaupum og keppti síðar í öðrum greinum frjálsra íþrótta, þar á meðal í tugþraut. Árið 1970 var Breiðablik fjölmennasta íþróttafélag landsins og lék stórt hlutverk innan UMSK, Gestur Guðmundsson var þá formaður félagsins og ritaði í 20 ára afmælisriti þess: „Það má segja það með réttu, að uppskeran af því fræi sem sáð var 1950 með stofnun Breiðabliks sé bæði mikil og góð. Félagið hefur verið leiðandi félagsskapur ungs fólks í þessum fjölmenna bæ. Það hefur laðað til sín hundruð unglinga sem þátt hafa tekið í starfsemi þess á ýmsum sviðum á þessum tuttugu árum.“157 Velgengni Breiðabliksmanna á sviði frjálsra íþrótta hélt áfram næstu áratugina, þeir fengu fullgildan frjálsíþróttavöll í Kópavogsdal árið 1975, árið 1978 var Hafsteinn Jóhannesson formaður frjálsíþróttadeildar Breiðabliks og sagði þá í viðtali við Íþróttablaðið: ,,Aðstaða okkar breyttist gífurlega við tilkomu þessa vallar. Áður þurftum við að sækja mikið til Reykvíkinga því það eina sem við höfðum upp á að bjóða var túnflöt, 100 metra löng braut, stökkgryfja og lítill skúr fyrir búningsaðstöðu. Þessi nýja og bætta aðstaða hefur aukið áhuga okkar og velgengni til muna.“158 Auk þess að æfa á nýja vellinum var æft í Baldurshaga og íþróttahúsinu Digranesi. Nýtt afreksfólk kom til sögunnar, til dæmis Guðrún Karlsdóttir og Hrönn Guðmundsdóttir sem setti UMSK-met í 800 metra hlaupi árið 1982. Guðrún Arnardóttir, spretthlaupari úr Breiðabliki, hlaut frjálsíþróttabikar UMSK árið 1990 og 1991, hún gekk til liðs við Glímufélagið Ármann í ársbyrjun 1993 og keppti í 400 m grindahlaupi á Ólympíuleikunum í Atlanta árið 1996 og hljóp á nýju Íslandsmeti, 54,81 sek. Guðrún keppti einnig á Ólympíuleikunum í Sydney árið 2000 og var í 7. sæti í 400 m grindahlaupi, í árslok 2022 var hún tekin inn í heiðurshöll ÍSÍ. Á 9. áratugnum blómstraði Svanhildur Kristjónsdóttir sem hlaupari og langstökkvari, árið 1987 átti hún öll UMSK-metin í spretthlaupum og einnig í langstökki og þar af var eitt Íslandsmet, í 200 m hlaupi, 24,3 sek. UMSK-met hennar frá 60 m hlaupi til 400 m hlaups voru sett á árunum 1984–1987.159 Erlingur Jóhannsson var geysilega öflugur hlaupari og átti um skeið öll UMSKmetin í hlaupum frá 100 m til 800 m, hann á enn Íslandsmetið í 800 m hlaupi, hljóp á 1:48,83 mín. árið 1987. Á þessu kröftuga blómaskeiði féllu héraðsmet UMSK eitt af öðru, árið 1985 var met Tómasar Lárussonar í fimmtarþraut frá árinu 1952 það langelsta.160 Síðan féll metið, Halldór Lárusson, náfrændi Tómasar, setti nýtt met í fimmtarþraut árið 2005, fékk 3565 stig. Hann keppti fyrir Aftureldingu líkt og Tómas, annars á Breiðbliksfólk langflest UMSK-metin í frjálsum íþróttum. Hér verður nefnt til sögu afreksfólk úr Breiðabliki sem hefur sett mark sitt á sögu félagsins og UMSK síðustu tvo til þrjá áratugina: Jón Sigurjónsson á UMSK-metið í sleggjukasti, kastaði 63,68 m árið 1993. Geir Sverrisson náði góðum árangri í spretthlaupum, árið 1998 hljóp hann á þeim „skemmtilega“ tíma 11,11 sek.161 Sama ár hlaut hann frjálsíþróttabikar UMSK. Sólveig Hildur Björnsdóttir spretthlaupari hlaut frjálsíþróttabikar UMSK árið 1999. Aðalheiður M. Vigfúsdóttir hlaut frjálsíþróttabikar UMSK árið 2000 og setti UMSK-met í sleggjukasti árið 2008, kastaði 51,25 metra. Frjálsíþróttafólk úr Breiðabliki árið 1974, talið frá vinstri: Guðmundur Jóhannesson, Karl West Frederiksen, Hafdís Ingimarsdóttir, Arndís Björnsdóttir, Guðmundur Geirdal og Karl Stefánsson þjálfari.
RkJQdWJsaXNoZXIy MjQwMzI0OQ==